“Hashim Thaçi po mbahet në Hagë pa gjyq”, Richard Grenell: Evropa ka dështuar

I dërguari i posaçëm i ish-Presidentit Amerikan Donald Trump për misione speciale, Richard Grenell, ka deklaruar se ish-presidenti i Kosovës, Hashim Thaçi, po mbahet në burgun e Hagës pa gjyq.

Përmes një postimi në rrjetet sociale, Grenell u shpreh se Evropa ka dështuar dhe nuk po reagon ndaj padrejtësisë që, sipas tij, po i bëhet Thaçit.

Ai madje tha se Thaçi duhet të padisë Hagën në gjykatat amerikane.

“Ka shumë arsye pse Europa po dështon. Por një shembull është numri i madh i politikanëve evropianë që heshtin për Hagën, e cila mban një Kryetar Shteti në burg për 5 vjet pa gjyq. Dhe pastaj gjyqi zgjat edhe më shumë vite. Është një sistem brutal, arkaik, i drejtuar nga elitat. Kjo nuk është drejtësi. Dhe askush nuk duhet të marrë më kurrë këshilla gjyqësore nga një evropian. Shpresoj që Hashim Thaçi t’i padisë të gjithë në Hagë në një gjykatë amerikane kur të jetë jashtë – në fund të fundit, janë para të taksapaguesve amerikanë,” shkruan Grenell.