Hedhja e molotovit para Bashkisë Tiranë, AMA: Siguria e reporterëve u vu në rrezik

Autoriteti i Mediave Audiovizive (AMA) ka reaguar për incidentin para godinës së Bashkisë së Tiranës, ku një grup gazetarësh dhe kameramanësh u vunë në rrezik nga përdorimi i molotovit.

Përmes një njoftimi në Facebook, AMA shprehet se pasiguria në punën e medias që mbulon një protestë a demonstratë është e papranueshme, goditje për fjalën e lirë dhe kufizim për informimin e publikut.

AMA po ashtu i kërkon autoriteteve ligjzbatuese që të marrin masa konkrete për të mbrojtur aktivitetin e reporterëve në terren.

Njoftimi i AMA-s:

Autoriteti i Mediave Audiovizive, AMA, përcolli me shqetësim sot paradite (28.05.2024), incidentin para godinës së Bashkisë së Tiranës, ku siguria e grupit të reporterëve dhe kameramanëve të medias u vu në rrezik si pasojë e përdorimit të lëndëve shpërthyese (molotov).

Pasiguria në punën e medias që mbulon një protestë a demonstratë është e papranueshme, është goditje për fjalën e lirë dhe kufizim për informimin e publikut.

Autoritetet ligjzbatuese të rendit, por dhe organizatorët e protestave, duhet të marrin masa konkrete për të mbrojtur aktivitetin e reporterëve në terren, për të lënë të hapur komunikimin e tyre me publikun në mbulimin e dinamikës së ngjarjeve.

Ju kërkojmë autoriteteve, që të identifikojnë sa më parë dhe të ndjekin ligjërisht çdo akt që sulmon drejtpërdrejt apo rrezikon ekipet e medias që janë në kryerje të detyrës.

Autoriteti i Mediave Audiovizive

LEXONI GJITHASHTU:

• Molotov drejt bashkisë Tiranë, ndalohet protestuesi, procedohen 3 të tjerë
• Dyshohet se hodhi molotov në drejtim të Bashkisë së Tiranës, arrestohet 38-vjeçari