Qeveria ka siguruar fondet për ndërtimin e hekurudhës Vorë-Hani i Hotit. Granti me vlerë 136 mln euro është firmosur nga ministri i financave dhe ambasadori i Bashkimit Europian në Shqipëri.

136.2 mln euro do të na japë Bashkimi Evropian për ndërtimin e hekurudhës Vorë – Hani i Hotit. Marrëveshja është firmosur në Tiranë, nga Ministri i Financave Ervin Mete, Ambasadori i BE-së Silvio Gonzato dhe shefja e BERZH-it në Shqipëri Ekatarina Solovova.

“Është granti më i madh i akorduar ndonjëherë nga Bashkimi Evropian për një projekt investimi në Shqipëri. Duke i shtuar edhe grantin për linjën hekurudhore Durrës-Rrogozhinë, shuma totale e granteve të akorduara nga institucionet e BE-së për investime në infrastrukturë pritet të arrije në mbi 200 milionë Euro”, – tha Mete.

Ndërtimi për hekurudhën nis në vitin 2025 dhe do të shërbejë për transportin e qytetarëve e mallrave, e po ashtu edhe për zhvillimin e turizmit.

“Investimi më i madh i BE-së në Shqipëri deri më sot do të rilidhë shqiptarët brenda pjesës tjetër të rajonit dhe Evropës me tren. Linja hekurudhore e rinovuar do të nxisë udhëtimet brenda vendit, turizmin ndërkombëtar, si dhe do të mbështesë zhvillimin e përgjithshëm socio-ekonomik të Shqipërisë. Ajo do të reduktojë ndikimin mjedisor të transportit të mallrave dhe të pasagjerëve, falë elektrifikimit të linjës së re.”, – tha ambasadori Silvio Gonzato.

“Duke investuar në infrastrukturën e gjelbër, ne po i hapim rrugën rritjes ekonomike dhe një të ardhmeje më të qëndrueshme”, – tha Ekatarina Solovova, Shefe e BERZH-it në Shqipëri.

Shqipëria po rikthen trenat pas afro 3 dekadash degradim, duke planifikuar të shtrijë rreth 120 km shina me stacione dhe sisteme që do të garantojnë shpejtësi deri në 100 km në orë.

LEXONI GJITHASHTU:

• 8.6 mld dollarë investime të huaja në rajon, Shqipëria zë vendin e dytë
• KE njofton paketën e 6-të, 8 investime të reja kryesore për Ballkanin Perëndimor