8.6 mld dollarë investime të huaja në rajon, Shqipëria zë vendin e dytë

Bizneset e huaja kanë investuar 1.6 mld dollarë gjatë vitit të kaluar në prona dhe shërbime financiare. Ky fluks investimesh na rendit të dytin në rajon pas Serbisë, e cila ka thithur mbi 4.8 mld dollarë.

Investimet e huaja direkte arritën në 8.6 mld dollarë në rajonin e Ballkanit Perëndimor gjatë vitit 2023.

Në vlerësimin që bën UNCTAD, një agjenci e Organizatës së Kombeve të Bashkuara, Serbia ka tërhequr më shumë se gjysmën e fluksit të parave, ndjekur nga Shqipëria e cila për më shumë se një dekadë ka zënë vendin e dytë në rajon për afrimin e kompanive të huaja.

Vitin e kaluar, në vendin tonë fluksi i parave ishte mbi 1.6 mld dollarë, me interes të shtuar në pasuritë e paluajtshme, shërbimet, financiare dhe  industrinë nxjerrëse.

Ndërkohë, fqinjët e Maqedonisë së Veriut kanë regjistruar rënie vitin e kaluar, dhe nuk po arrijnë të kapin pragun e 1 mld dollarëve, pavarësisht nga lajmërimet se anëtarësimi në NATO përkthehet me më shumë investime të huaja.

Me fluksin 667 mln dollarë, Maqedonia e Veriut qëndron ndërmjet Bosnje-Hercegovinës, Malit të Zi dhe Kosovës.

Edhe në këto vende, interesi më i madh mbetet për biznes mbetet në fushën e pasurive të paluajtshme.

Ndërkohë, pesha më e madhe e parave me kapital të huaj që injektohet në ekonominë rajonale i përket Malit të Zi me 9% të Prodhimit të Brendshëm Bruto, ndërsa në Shqipëri ajo zë 5% të PBB-së.