Heqja e dinarit, Kurti: S’ka asnjë masë ndëshkuese gjatë periudhës së tranzicionit

Kryeministri i Kosovës Albin Kurti ka bërë me dije se qeveria e Kosovës nuk do të zbatojë  asnjë masë ndëshkuese gjatë periudhës së tranzicionit lidhur me vendimin e BKQ për heqjen e dinarit.

Përmes një postimi në platformën X, Kurti shprehet se qeveria është duken punuar për informacione më të plota, të cilat do t’i zbulojnë në ditët në vijim

“Qeveria e Kosovës, në kuadër të kompetencave të saj, nuk do të zbatojë asnjë masë ndëshkuese gjatë periudhës së tranzicionit dhe u bën thirrje shtyllave të tjera që të mbajnë të njëjtin qëndrim me përkushtim. Jemi duke punuar për informacione më të plota, të cilat do t’i zbulojmë në ditët në vijim”, shprehet Kurti.

Kryeministri i Kosovës, gjatë një interviste për Bloomberg tha se nuk do të hiqet dorë nga vendimi që vetëm euroja të jetë valuta për pagesa në Kosovë, por tha se po respekton kërkesat e faktorit ndërkombëtar për këtë çështje.

Që nga 1 shkurti, në Kosovë ka hyrë në fuqi një rregullore e Bankës Qendrore të Kosovës, e cila përjashton valutat e tjera, përfshirë dinarin serb, për pagesa.