Hetim vdekjes së Prigozhin, ekspertët: Akt demonstrativ, Putin eliminoi armiqtë

Një hetim ka nisur në Rusi mbi incidentin ajror që shkaktoi vdekjen e Yevegeny Prigozhin, shefi i grupit paraushtarak “Wagner” dhe armik i betuar i Kremlinit që nga rebelimi i qershorit, ngjarje që shtoi spekulimet se ai mund të ekzekutohej.

Deri tani, asnjë zyrtar rus nuk e ka komentuar episodin. Presidenti Vladimir Putin, që e konsideronte liderin e mercenarëve një tradhtar, nuk e ngriti çështjen në shfaqjet e tij publike mbrëmjen e së mërkurës dhe mëngjesin e së enjtes.

“Ky është një akt demonstrativ. Tek e fundit, Prigozhin mund të ishte vrarë në heshtje përmes helmimit, apo të kishte vdekur nga ataku në zemër, sikurse u ka ndodhur shumë kundërshtarëve të Putin. Por këtë herë në lojë ka faktorë të tjerë. E para, vrasja e një personi nuk mjafton. Duhet të largosh të gjithë bashkëpunëtorët e tij, pasi ata e kanë një plan B se si të veprojnë në rast se humbasin shefin dhe ky plan nuk i shkon për shtat Vladimir Putin. Ndaj, opsioni ideal është t’i eliminosh të gjithë, gjë që në fakt ndodhi”, tha Dmitry Oreshkin, profesor në Universitetin e Rigës.

Në rrjetet sociale, profile të afërta me “Wagner”, pasi kompania nuk ka një prani zyrtare online, sugjeronin se një raketë tokë-ajër ishte qëlluar ndaj avionit ku udhëtonte Prigozhin, duke rritur spekulimet se ai është vrarë.

Ndërkohë, gjatë natës, simpatizantë të shumtë u mblodhën jashtë selisë së “Wagner” në Shën Petersburg, duke vendosur lule dhe duke ndezur qirinj në nder të tij.

Në datat 23-24 qershor, Yevgeny Prigozhin udhëhoqi një rebelim kundër shefit të shtabit të përgjithshëm rus dhe ministrit të Mbrojtjes, duke marshuar në Moskë, duke pushtuar një bazë ushtarake dhe duke rrëzuar një avion të ushtrisë ruse. Ai hoqi dorë nga plani i tij pas ndërmjetësimit me presidentin bjellorus Lukashenko.

LEXONI GJITHASHTU:

• Zelensky: Ukraina s’ka asnjë lidhje me rrëzimin e avionit të Prigozhin
• Rrëzimi i avionit të Prigozhin, eksperti publikon fotot: S’ka qenë aksident