Hetimet për Klodian Rashën vijojnë, nuk kishte njohje me efektivin, rikthehet në detyrë kolegu i Hajdarajt

Verifikimet shtesë të Prokurorisë së Tiranës nuk arritën të japin të dhëna se polici i ‘Shqiponjave’, Nevaldo Hajdaraj dhe viktima Klodian Rasha kishin njohje të mëparshme.

Por, pengesë për mbylljen e hetimeve dhe dërgimin e çështjes në gjyq po bëhet ekspertimi i armës së gjetur më shumë se 100 metra larg vendngjarjes.

Për këtë, me ndihmën e disa ekspertëve të huaj që asistojnë policinë janë kontaktuar dhe po vijojnë procedurat me disa laboratorë të specializuar jashtë vendit, ku pritet të dërgohet pistoleta mini ‘Glock’ pa gjurmë dhe e paidentifikuar se kujt i përket.

Ndërkohë, pas disa ditësh i pezulluar, efektivi tjetër i ‘Shqiponjave’, Erion Gjore që ndodhej ditën e ngjarjes se bashku me Nevaldo Hajdarajn, është rikthyer në detyrë.

Tashmë që e gjithë skema e ngjarjes është zbardhur, duket se pistoleta pa një zotërues po mban peng hetimet.

Polici i ‘Shqiponjave’, Nevaldo Hajdaraj që qëlloi mbi 25-vjeçarin në orët e para të mëngjesit të 8 dhjetorit, aktualisht akuzohet për vrasje në kapërcim të kushteve të mbrojtjes së nevojshme. Por prokuroria pritet ta ndryshojë akuzën në “vrasje me dashje”, çka do të rëndojë pozicionin e efektivit, pasi kjo vepër penale e ka marzhin e dënimit nga 10 deri në 20 vite burg.