Hetimi i pronave në Lalëz, si u tjetërsuan mijëra m2 përmes falsifikimit

SPAK njoftoi shpalljen në kërkim të Aleksandër Lahos me tre akuza. Mes tyre ishte ajo e falsifikimit të dokumentacioneve. Në të njëjtin njoftim Prokuroria e Posaçme thotë se ka sekuestruar 403 mijë metër katrorë prona në Gjirin e Lalzit.

Dyshimet e SPAK janë që prona në fjalë është tjetërsuar përmes falsifikimit, ku nën hetim është edhe shtetasi me inicialet I.K., ish-përfaqësues i Avokaturës së Shtetit në Durrës, për të cilin gjykata e posaçme ka caktuar masën e sigurisë arrest shtëpie më 20 tetor të këtij viti.

SPAK ka në dorë një video-përgjim të qershorit 2017. Në përgjim dyshohet se shfaqet Aleksandër Laho, njohur edhe si ‘Rrumi i Shijakut’, duke biseduar me shtetasin I.K. për një shumë parash.

SPAK pretendon se në këtë video-përgjim, I.K. ka kërkuar 12 milionë lekë në këmbim të mosapelimit të procesit gjyqësor në lidhje me pronësinë e 45 mijë metra/katrorë pronë shtetërore në Gjirin e Lalzit.

Prokuroria e Posaçme e siguroi këtë video pas atentatit ndaj prokurorit Arjan Ndoja më 1 nëntor të 2019-s. Ai u qëllua në momentin që po udhëtonte me mjet në vendin e njohur si ‘Mbikalimi i Shkozetit’ në Durrës.

Në automjet bashkë me të ndodhej edhe Aleksandër Laho dhe Andi Maloku. Nga të shtënat, Arjan Ndoja mbeti i plagosur së bashku me Aleksandër Lahon, ndërsa Andi Maloku mbeti i vrarë.

Shënjestra e sulmit dyshohet se ka qenë Aleksandër Laho dhe përfshirja e tij në tjetërsimin e pronave në Gjirin e Lalëzit.

LEXONI GJITHASHTU:

• Shpallet në kërkim “Rrumi i Shijakut”, i përfshirë në rrëmbimin e dy vëllezërve
• Dosja e “Rrumit të Shijakut” dhe vëllezërve Beqiraj i kalon SPAK