Hill dëshmon në Hagë: Isha skeptik për takimin Rugova-Millosheviç në Beograd

Ish-diplomati Christopher Hill ka nisur dëshminë e tij në Gjykatën e Hagës në gjyqin që po mbahet ndaj ish-krerëve të UÇK, Hashim Thaçit dhe të tjerëve.

Në dëshminë e tij, Hill tha se SHBA-ja e nxiti Ibrahim Rugovën të takohej me Sllobodan Millosheviçin në Beograd më 1998.

“Kur ambasadori [Richard] Holbrooke shkoi në Prishtinë, unë isha me të, dhe u ulëm me presidentin Rugova. Edhe pse nuk e kishim diskutuar këtë paraprakisht, ambasadori Holbrooke tha se ishte ide e mirë nëse Rugova do ta takonte Millosheviçin në Beograd, sepse mendonte se ky takim do të zgjidhte shumë probleme”.

“Unë isha shumë skeptik”, tha Hill.

I pyetur nëse takimi mes Rugovës dhe Millosheviçit kishte ndikim në imazhin që kishte Rugova te shqiptarët e Kosovës, Hill theksoi:

“Mendoj se e dëmtoi Rugovën, sepse njerëzit në Kosovë nuk mund t’i ndihmonte. Unë kisha rezerva se takimi mund të ndihmonte. Ai ishte shumë i shqetësuar, por nuk donte që në takimin e parë me Holbrooke të gjendej në një situatë ku refuzonte”, shpjegoi Hill.