Hiqen vizat me 5 shtete, Shqipëria synon të tërheqë turistë nga Azia

Shqipëria synon të tërheqë sa më shumë turistë nga e gjithë bota. Për këtë arsye, vendi ynë ka  hequr vizat me 5 shtete aziatike, të cilat të gjitha së bashku kanë popullsi që arrin deri në 115 milionë banorë.

Bëhet fjalë për Arabinë Saudite, Bahrejnin, Katarin, Omanin dhe Tajlandën, banorët e të cilëve mund të vizitojnë vendin tonë pa pengesa në kufi dhe për këtë mund të rezervojnë paketa turistike deri në 31 dhjetor.

Vendimi për heqjen e vizave me këto shtete është marrë nga Këshilli i Ministrave, pas propozimit të ministrit të jashtëm, Igli Hasani dhe ka hyrë në fuqi duke nisur nga java e dytë e marsit.

Edhe pse konsiderohen si vende të largëta, e pa ndonjë histori të fortë lidhjeje me këto vende, mundësitë e shtuara me linja ajrore apo oferta turistike, mund të bëhen shkas që një pjesë e njerëzve atje të vijnë në vendin tonë. Kujtojmë se vendime të ngjashme, Shqipëria i ka marrë edhe vitet e kaluara, me shtete të tjera, në prag të sezonit veror.