Humbin jetën dy persona nga virusi Marburg, i ngjashëm me Ebolën

Dy persona në Ganë kanë humbur jetën si pasojë e infektimit me virusin Marburg, i cili shkakton sëmundje të ngjashme me Ebolën.

Organizata Botërore e Shëndetësisë deklaroi se të dy pacientët në rajonin Ashanti të Ganës jugore kishin simptoma të tilla si diarre, ethe, të përziera dhe të vjella para se të ndërronin jetë.

Marburg, i quajtur sipas qytetit në Gjermani ku u regjistrua rasti i parë, është një sëmundje që shkakton ethe dhe simptoma të tjera të ngjashme me Ebolën, shkruan Euronews.

Ky virus përhapet përmes kontaktit të drejtpërdrejtë me lëngjet trupore të njerëzve dhe sipërfaqeve të infektuara.

Virusi është jashtëzakonisht i rrezikshëm, me një shkallë mesatare të vdekshmërisë prej rreth 50 për qind.

Sipas OBSH-së, aktualisht nuk ka asnjë trajtim të licensuar për të neutralizuar virusin.

Rastet e para me këtë virus u regjistruan në Gjermani, në Marburg dhe Frankfurt dhe në Beograd të Serbisë në vitin 1967.

Këto raste ishin të lidhura me punën laboratorike duke përdorur majmunët e gjelbër afrikanë të importuar nga Uganda.

LEXONI GJITHASHTU

• Zbulohet një virus i ngjashëm me linë, çfarë dimë deri tani?
• Zika, rreziku i përhapjes së një virusi nëpërmjet mushkonjave