Humbja e zgjedhjeve, Kryemadhi: Gabuam në djegien e mandateve dhe me bojkotin e zgjedhjeve lokale

Kryetarja e LSI-së Monika Kryemadhi i ka quajtur zgjedhjet e 25 prillit, një fitore të oligarkëve dhe bandave.

“Së pari dua të uroj fitoren e oligarkëve dhe bandave se janë fituesit e vërtetë të zgjedhjeve që sapo kaluam, se janë të parët që duhen uruar. Së dyti uroj presidentin Vuçiç për sondazhet e sakta që dha për zgjedhjet në Shqipëri”, u shpreh Kryemadhi në një deklaratë për mediat.

“Dua të falënderoj 107 mijë votuesit e vlefshëm që ja dhanë votën LSI-së dhe dua të falënderoj edhe 81 mijë e votuesit e pavlefshëm kur 70% e tyre janë votues të LSI-së”, tha ajo më tej.

Gjatë fjalës së saj ajo deklaroi se djegia e mandateve dhe bojkoti i zgjedhjeve lokale ishte një strategji e gabuar.

“Patëm një strategji të gabuar duke filluar që nga djegia e mandateve, mos marrjapjesë ne zgjedhjet lokale dhe në mënyrë të qëllimshme, me dashje apo pa dashje i dhamë të gjithë pushtet në dorë Ramës, bandave dhe oligarkëve, për të tjetërsuar Kushtetutën”, shtoi ajo më tej.

Kryetarja e LSI-së i kërkoi falje presidentit Ilir Meta në emër të partisë dhe në emër të saj, lidhur me shqetësimin e kreut të shtetit për djegien e mandateve.

Ajo theksoi se është e zhgënjyer, por nënvizoi se LSI do të ringrihet.

“Zhgënjimin e kam pasur shumë të madh, por për një gjë jam e kthjellët; ky sistem është një sistem që i doli boja. LSI me 107 mijë vota merr 4 mandate dhe një tjetër forcë politike me 35 mijë vota që nuk dihet çfarë është, merr 3”, tha Kryemadhi.