Hyri në det për të notuar, policia në kërkim të portugezit në Sarandë

Një turist 57-vjeçar nga Portugalia ka humbur kontaktin me miqtë e tij pasi u fut në det për të notuar në zonën e njohur si “Buka e Vivarit”, pranë lagunës në Sarandë.

Ngjarja ka ndodhur pasditen e sotme, rreth orës 18:00, kur shtetasi portugez A. G., që ndodhej për pushime me disa miq, është futur në det dhe që prej asaj kohe nuk është parë më.

Menjëherë pas marrjes së njoftimit, policia kufitare e Sarandës, së bashku me patrullat e zonës, kanë nisur kërkimet si nga deti ashtu edhe nga toka për gjetjen e tij.

Autoritetet po vijojnë punën për të zbardhur rrethanat e ngjarjes dhe për të lokalizuar turistin e zhdukur.