Hyri në Shqipëri me një arsenal armësh në makinë, lihet në burg pa afat 53- vjeçari

Gjykata e Durrësit ka vendosur sot “arrest në burg pa afat” si masë shtrënguese për Selman Lajçin, 53- vjeçarin që hyri në Shqipëri me një arsenal armësh në makinë.

Në seancën e zhvilluar me dyer të mbyllura, Lajçi nga Kosova theksoi edhe njëherë para togave të zeza se armët i kishte për përdorim personal dhe se për to posedonte leje.

Pavarësisht këtyre pretendimeve, në përfundim të gjykimit gjyqtarja Nurjeta Tafa vendosi ta lërë në burg.

Lajçi u arrestua të enjten e kaluar pasi në automjetin e tij tip “Land Rover” me targa zviceriane, u gjetën të fshehura një armë zjarri pistoletë, një snajper, një armë gjahu, 1367 copë fishekë luftarak dhe 800 copë fishekë për armë gjahu, të cilat u sekuestruan në cilësinë e provës materiale.

Ai hyri në Shqipëri nëpërmjet kalimit kufitar të portit të Durrësit me një traget të linjës Ankona-Durrës dhe kishte destinacion Kosovën.

LEXONI GJITHASHTU: 

• Përfshirja në përgjimet e Elbasanit? Balla: Dorëzova padi, t’i shkohet deri në fund
• Emigrant për punë në Katar, Zaimi: S’ka keqtrajtime, nuk rikthehem në Shqipëri