I dërguari special i Trump, Witkoff: Rusia bëri lëshime për territoret e pushtuara

Në një intervistë për CNN, Steve Witkoff, i dërguari special i presidentit amerikan Donald Trump, deklaroi se Rusia ka bërë disa lëshime të rëndësishme gjatë bisedimeve të fundit për çështjen e Ukrainës. Sipas tij, këto lëshime lidhen me pesë rajonet e aneksuara nga Moska: Donetsk, Luhansk, Kherson, Zaporizhzhia dhe Krimea.

Këto territore u aneksuan në mënyrë të njëanshme nga Rusia – Krimea në vitin 2014 dhe katër rajonet e tjera pas referendumeve të kontestuara në vitin 2022 – por vazhdojnë të njihen ndërkombëtarisht si pjesë e Ukrainës sovrane.

Witkoff vuri në dukje se Donetsku mbetet një nga pikat më të ndjeshme në tryezën e negociatave, duke e përshkruar si “një diskutim të rëndësishëm” që pritet të zgjidhet në fazat e ardhshme të dialogut. Ai konfirmoi se bisedimet do të vazhdojnë në Uashington, ku presidenti ukrainas Volodymyr Zelensky pritet të zhvillojë një takim të rëndësishëm me presidentin Trump në Zyrën Ovale.

“Rusët bënë disa lëshime në tryezë në lidhje me të pesë këto rajone. Ka një diskutim të rëndësishëm që duhet të zhvillohet në lidhje me Donetskun dhe çfarë do të ndodhë atje”, tha Witkoff. “Dhe ky diskutim do të detajohet konkretisht të hënën, kur Presidenti Zelensky të mbërrijë me delegacionin e tij dhe disa nga udhëheqësit e tjerë evropianë. Dhe shpresojmë që të mund të kalojmë dhe të marrim disa vendime pikërisht atëherë për këtë.”

Gjithashtu, sipas Witkoff, gjatë samitit të Alaskës, Vladimir Putin i dha Trump garanci të paprecedentë sigurie, duke u zotuar se Rusia nuk do të sulmojë asnjë vend tjetër ose asete amerikane pasi të finalizohet marrëveshja e paqes me Ukrainën.

Në kuadër të bisedimeve, është diskutuar edhe mundësia e shkëmbimit të territorit mes palëve, me synimin për të arritur një marrëveshje të qëndrueshme paqësore në rajon.

Putini kundërshton me vendosmëri anëtarësimin e Ukrainës në NATO, dhe Witkoff thotë se ky rregullim mund të jetë një alternativë nëse “ukrainasit mund ta pranojnë këtë”.

Witkoff thotë gjithashtu se SHBA-të patën një bisedë të mirë dhe të detajuar me Presidentin ukrainas Zelensky gjatë udhëtimit me aeroplan për në shtëpi nga Alaska dhe beson se takimi i së hënës në Uashington do të ishte produktiv.

Sipas Witkoff, qëllimi kryesor i administratës Trump është finalizimi i një marrëveshjeje paqeje që do t’i japë fund luftës, duke ruajtur interesat e sigurisë për të gjitha palët e përfshira.

LEXONI GJITHASHTU:

• Dokumente të klasifikuara zbulojnë detaje nga samiti Trump-Putin për Ukrainën
• Zbulohet përmbajtja e letrës personale të Melania Trump që iu dorëzua Putinit