I gjetën armë zjarri në banesë, arrestohet një person. I dënuar më parë për vrasje

Një person në Tiranë është arrestuar në kuadër të operacionit policor të koduar “Ekol”. Gjatë kontrolleve në banesën e personit me inicialet V.K., policia ka gjetur një armë zjarri pa leje si dhe municion luftarak.

Sipas njoftimit të policisë, ky person ka qenë i dënuar më herët në Gjermani për vrasje.

“Komisariati i Policisë Nr.4, në bazë të informacioneve të siguruara në rrugë operative nga burime të ndryshme, finalizoi me sukses operacionin policor të koduar “Ekol ”, në kuadër të të cilit u bë kapja dhe arrestimi në flagrancë i shtetasit V. K., banues në Tiranë, i dënuar më parë për vrasje në shtetin Gjerman.

Nga ana e sherbimeve të Komisariatit të Policisë Nr.4, janë siguruar informacione nga inteligjenca policore, për një shtetas që mbante armë zjarri pa leje, në banesë.

Mbi bazën e këtyre informacioneve, falë veprimeve të shpejta dhe profesionale, shërbimet e Policisë kanë ushtruar kontroll në banesën e shtetasit V.K, dhe kanë gjetur dhe sekuestruar në cilësinë e provës materiale një armë zjarri pistoletë dhe municion luftarak”,-thuhet në njoftimin e policisë.