Turqia ka rikthyer aksesin në Instagram pas më shumë se një jave bllokimi në mbarë vendin. Autoriteti i Teknologjive të Informacionit dhe Komunikimit ndaloi aksesin në Instagram më 2 gusht pa dhënë një arsye specifike. Zyrtarët qeveritarë thanë më vonë se ndalimi u vendos për shkak se platforma e mediave sociale dështoi të respektonte ligjet turke.

“Në bisedimet tona me zyrtarët e Instagramit, ne u siguruam që kërkesat tona do të plotësoheshin, veçanërisht ato në lidhje me aktivitetin kriminal, dhe u premtuam se do të punonim së bashku në një mjet për censurimin e përdoruesve,” shkroi Abdulkadir Uraloğlu, ministri turk i transportit dhe infrastrukturës, në platformën e mediave sociale X të shtunën kur u hoq ndalimi.

Uraloğlu shtjelloi në një video, të postuar gjithashtu në X, duke thënë se platforma “do të vendoste pajtueshmërinë me ligjin turk dhe se në rastet kur ligji shkelej, do të kishte ndërhyrje të shpejtë dhe efektive”.

Ai shtoi se të gjitha llogaritë në pronësi të organizatave “terroriste” do të ndalohen dhe e gjithë përmbajtja që promovon organizata të tilla do të hiqet, duke veçuar PKK, PYD dhe FETO.

PKK, ose Partia e Punëtorëve të Kurdistanit, është një grup i jashtëligjshëm që ka zhvilluar një kryengritje prej dekadash brenda Turqisë për të krijuar një rajon autonom në Turqinë juglindore.

PYD është një organizatë politike kurde siriane që zyrtarët turq pretendojnë se është një krah i PKK.

Ndërkohë, FETO është lëvizja e udhëhequr nga Fethullah Gylen, një ish-aleat i Presidentit Recep Tayyip Erdoğan, të cilin qeveria e fajëson për një përpjekje të dështuar për grusht shteti në vitin 2016.