I shpallur në kërkim për kalim të paligjshëm emigrantësh, arrestohet 22-vjeçari

Një 22-vjeçar nga Saranda me inicialet D.N. i cili ishte shpallur në kërkim pasi tentoi të ndihmonte emigrantë, që të kalonin ilegalisht kufirin, është vënë në pranga.   Ai ndihmonte emigrantët nga vendet e treta që të kalonin kufirin kundrejt pagesës.

“Specialistët e Seksionit për Hetimin e Trafiqeve të Paligjshme dhe Narkotikëve, në bashkëpunim me Komisariatin e Policisë Sarandë, kanë kapur dhe ndaluar shtetasin D. N., 22 vjeç, banues në Sarandë, i cili ishte shpallur në kërkim në kuadër të operacionit policor të koduar “Road Guard 25”.

Gjatë operacionit të zhvilluar në muajin qershor të vitit 2022, në aksin rrugor Skërficë-Ura e Kardhiqit, në afërsi të fshatit Çepunë, ky shtetas, duke drejtuar automjetin tip “Benz”, me të cilin po transportonte 4 emigrantë të paligjshëm, sapo ka vënë re se po ndiqej nga shërbimet e Policisë, ka braktisur automjetin dhe është larguar.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme”,-thuhet në njoftimin e policisë.

LEXONI GJITHASHTU:

• Polonia dërgon ushtarë pranë kufirit me Bjellorusinë
• Zgjedhje të parakohshme? Flet Bardhi: Arsyet dhe shanset reale për t’u përballur