I shpallur në kërkim për kultivim të narkotikëve dhe armëmbajtje pa leje, arrestohet 33-vjeçari në Divjakë

Policia e Divjakës ka vënë në pranga këtë të premten një 33-vjeçar, i shpallur në kërkim për kultivim të bimëve narkotike dhe mbajtje armësh pa leje.

Sipas raportimeve nga policia, në pranga ka rënë shtetasi D. S., 33 vjeç, i cili ishte dënuar nga Gjykata e Korçës me 4 vjet burg për të dyja veprat penale.

“Shërbimet e Komisariatit të Policisë Divjakë, në vijim të punës për lokalizimin dhe kapjen e shtetasve të shpallur në kërkim, bazuar dhe në informacionet e siguruara në rrugë operative, kanë bërë të mundur lokalizimin dhe kapjen e shtetasit në kërkim: D. S, 33 vjeç, banues në fshatin Çermë Sektor, Divjakë.

Ky shtetas është dënuar nga Gjykata e Korçës, me 4 vjet burgim, për veprat penale “Kultivimi i bimëve narkotike” dhe “Prodhimi dhe mbajtja pa leje e armëve të gjuetisë dhe sportive”. Nga ky dënim, atij i kanë mbetur për të kryer 1 vit, 10 muaj e 4 ditë”, thuhet në njoftimin e policisë.

Materialet procedurale për këtë shtetas u kryen nga shërbimet e Komisariatit të Policisë Pogradec.