“Ikën dritat në spital, vdiqën 4 persona”- QSUT përgënjeshtron Vokshin: E pavërtetë

Mbledhja e Komisionit të Shëndetësisë këtë të hënë, u shoqërua me një denoncim të fortë të nga ana e deputetes së Partisë Demokratike, Albana Vokshi.

Në fjalën e saj Vokshi deklaroi se 4 pacientë të intubuar kanë humbur jetën në QSUT, si pasojë e mungesës së energjisë elektrike për rreth 2 orë.

Por denoncimi është përgënjeshtruar nga Qendra Spitalore Universitare Nënë Tereza, ku thuhet se lajmi është i pavërtetë. Në reagimin e QSUT theksohet se ka pasur luhatje të tensionit të energjisë dhe difekti është rikuperuar menjëherë nga reagimi i teknikëve të spitalit të asistuar dhe nga OSHEE.

“QSUNT shpreh keqardhje për deklaratat e pavërteta në Komisionin për Punën, Çështjet Sociale dhe Shëndetësinë, të cilat afektojnë drejtpërdrejtë pacientët dhe shëndetin e tyre.

Qendra Spitalore Universitare “Nënë Tereza”, sa i takon deklaratave të bëra nga anëtarët e komisionit për ndërprerje të energjisë elektrike në një prej godinave të këtij spitali sqaron si më poshtë vijon:

Në datë 5 Prill, në orën 1:30 të mëngjesit, punonjësit teknikë të shërbimit 24 orësh kanë konstatuar luhatje të energjisë elektrike pranë Shërbimit të Reanimacionit Qendror. I menjëhershëm ka qenë reagimi i teknikëve shtesë të gatishmërisë të QSUT-së të cilët në bashkëpunim me Operatorin e Shpërndarjes së Energjisë Elektrike i kanë dhënë zgjidhje kësaj problematike duke bërë të mundur rikthimin e furnizimit me energji elektrike dhe normalizimin e situatës.

QSUNT sqaron opinionin publik se nuk ka asnjë të vërtetë sikurse është raportuar ditën e sotme për humbje jete të pacientëve dhe se shërbimi ndaj tyre nuk është cenuar në asnjë moment”, thueht në reagimin e QSUT.

Deklarata e Albana Vokshit:

Ngjarje e rëndë në QSUT. Sipas këtij informacioni nga një punonjës që punon në QSUT, aty kanë ikur dritat për më shumë se dy orë. Sipas këtij punonjësi ka pasur 4 të sëmurë që kanë humbur jetën, gjatë periudhës që kanë ikur dritat, pasi kanë qenë të intubuar, nuk ka funksionuar linja backup. Nëse ky informacion është i vërtetë do të ishte një skandal shumë i madh. Një spital si QSUT a mund të rri pa drita. A është e vërtetë që të premten në mëngjes duke u gdhirë kanë ikur dritat.