Ish-kandidati në Primaret e Partisë Demokratike për Bashkinë e Tiranës, Ilir Alimehmeti thotë se është e çuditshme që edhe në vitin 2023, flitet për cilësinë e ujit në kryeqytet.

Në emisionin “Barometri” në Euronews Albania, Ilir Alimehmeti u shpreh se kjo tregon gjendjen ku ndodhet kryeqyteti.

“Shoh diçka që më çudit në 2023. Shoh që ne vazhdojmë pyesim për cilësinë e ujit të pijshëm. Në 2023 ne nuk duhet të kishim më një diskutim të këtij tipi. Në Evropë, të vazhdosh të kesh pyetje për këti, kupton se ku ndodhemi ne”, theksoi ai.

Sipas sondazhit të Barometrit, 63.7 % e kryeqytetasve, problematikë kryesore të Tiranës, kanë renditur koston e jetesës.

41.4% e kryeqytetasve mendojnë që cilësia e ujit është më keq se ishte 5 vite më parë, 35.1% e tyre mendojnë se është më e mirë, ndërsa 23.4 % e kryeqytetasve mendojnë se cilësia e ujit të pijshëm është shumë më keq.