Imazhi më i detajuar i universit, teleskopi që ofron pamjen e parë unike

Një event i veçantë u zhvillua në Shtëpinë e Bardhë, ku u publikua fotografia e parë me ngjyra nga teleskopi i ri hapësinor James Webb.

Imazhi thuhet se është pamja më e thellë, më e detajuar me rreze infra të kuqe e Universit deri më sot.

Fotot e tjera debutuese nga James Webb do të publikohen nga NASA në një prezantim global. Presidenti Joe Biden zbuloi foton që tregon se universi është i mbushur me galaktika.

“Është një dritare e re në historinë e universit tonë. Sot do të shohim dritën e parë që do të shkëlqejë përmes asaj dritareje. Dritë nga botët e tjera, që rrotullohen rreth yjeve shumë përtej botës sonë. Ishte befasuese për mua kur e pashë”, u shpreh Joe Biden.

Teleskopi hapësinor James Webb prej 10 miliardë dollarësh, u lëshua në dhjetor të vitit të kaluar. Ai cilësohet pasardhësi i teleskopit të famshëm hapësinor Hubble.

Teleskopi do të bëjë të gjitha llojet e vëzhgimeve të qiellit, por ka dy qëllime kryesore.

Njëra është të bëj fotografi të yjeve të para që shkëlqenin në Univers më shumë se 13.5 miliardë vjet më parë; dhe e dyta të gjurmohen planetët e largët për të parë nëse mund të jenë të banueshëm.

Fotoja e parë do të pasohet nga katër shkrepje të tjera galaktike.

LEXONI GJITHASHTU:

• Sri Lanka ndalon vëllanë e presidentit që të udhëtojë jashtë vendit
• Protestat masive, Presidenti i Sri Lankës do të dorëhiqet më 13 korrik
• Vala e dytë e të nxehtit në Evropë, rrezik mbeten zjarret