IMT nis prishjen e shtesave dhe shkallëve në liqenin e Pogradecit

Inspektoriati ndërtimor pranë bashkisë së Pogradecit ka nisur prishjet e urave, shtesave dhe shkallëve prej betoni të cilat kishin bllokuar plazhin për qytetarët, duke mos lejuar aksesin për këta të fundit.

Ky lirim i hapësirave publike vjen pak para sezonit turistik dhe nga ana e bashkisë thuhet se qëllimi është që kjo zonë të lidhet me plazhin e “uçkave” si një hapsirë publike plazhi dedikuar tërësisht qytetarëve.

Aksioni i prishjeve është ndërprerë për të vijuar edhe ditën e martë, pasi duhet të bëhen disa ndërhyrje nga inxhinerët e ujësjellës-kanalizimeve në një stacion pompash në zonë.

Nga ana e banorëve nuk ka pasur rezistencë për prishjet, pasi ata ishin njoftuar më herët.

Ajo që vihet re edhe në pamje është se sasia e betonit të përdorur gjatë kohës së ndërtimeve ka qenë mjaft e madhe dhe me këto prishje liqenit i shtohet hapësira.