Incidenti me raketën, Turqia thërret ambasadorin iranian

Turqia ka thirrur ambasadorin iranian për ti kërkuar sqarime në lidhje me lëshimin e një rakete balistike drejt hapësirës së saj ajrore.

Ministria e Mbrojtjes e Turqisë njoftoi se mbrojtja ajrore e NATO-s e rrëzoi raketën këtë të mërkurë, mbi territorin Turk pasi ajo fluturoi sipër Irakut dhe Sirisë.

Ambasadori iranian është thirrur në Ministrinë e Jashtme në Ankara, në mënyrë që qeveria turke të regjistrojë protestën e saj, bëri të ditur një burim diplomatik.

Allison Hart, zëdhënëse e NATO-s, deklaroi më herët: “Ne dënojmë shënjestrimin e Turqisë nga Irani. NATO qëndron fort me të gjithë aleatët, përfshirë Turqinë, ndërsa Irani vazhdon sulmet e tij pa dallim në të gjithë rajonin. Qëndrimi ynë i parandalimit dhe mbrojtjes mbetet i fortë në të gjitha fushat, përfshirë mbrojtjen ajrore dhe raketore”, tha ajo.

Turqia njoftoi se do të zhvillojë bisedime me NATO-n dhe aleatët e tjerë pas incidentit.