Inflacioni i ulët, çmimet e larta, Xhepa: 3/4 e buxhetit për nevoja bazike

Inflacioni në Shqipëri është sot më i ulëti në rajon në nivelin 5.3%, e megjithatë çmimet mbeten të larta. Sipas eksperteve, 75% e buxhetit familjar shkon për mallra dhe shërbime bazike.

Të ardhurat nga paga janë rritur përgjatë një viti, ndërkohë që edhe çmimet pothuajse kanë ecur me të njëjtin nivel. Nëse do të krahasonim inflacionin dhe pagat, rezulton se për qeverinë këto të fundit janë rritur me ritëm më të lartë. Por, për ekspertët e ekonomisë në vend, diferenca nuk është ajo që propagandohet.

“Në fakt në qoftë se ne e skontojmë pagën mesatare të sotme në ekonomi me normën e inflacionit, paga e sotme mesatare në ekonomi është sa paga e katër viteve më parë, kështu që nuk kemi realisht të bëjmë me kompensim të fenomenit të inflacionit,” – u shpreh Selami Xhepa.

Për Xhepën, në Shqipëri gati 70% e të punësuarve jetojnë me të ardhura gati nën mesatare. Kjo pjesë e popullsisë shpenzon gati 3/4 të buxhetit për mallra bazike dhe si rrjedhojë, efekti i këtij inflacioni është shumë herë më i fortë sesa ajo që thuhet zyrtarisht.

“Shqipëria pavarësisht se ka një normë të ulët inflacioni, indeksin e përgjithshëm të çmimeve të konsumatorit, por në fakt nëse nisemi në strukturë Shqipëria ka probleme serioze me çmimet e produkteve bazike sepse çmimet e produkteve ushqimore, çmimet e bulmetit, çmimet e atyre që janë tryeza e përditshme e familjeve shqiptare në të cilat ne shpenzojmë gati gjysmën e të ardhurave tona, kuptohet që këto çmime janë rritur deri në 25%, pra çka do të thotë që efekti është disporpocional për grupet shoqërore,” – deklaroi Xhepa.

Në muajin mars, niveli i inflacionit në vend zbriti në 5.3% dhe krahasuar me rajonin, Shqipëria ka mbajtur të njëjtin pozicion, ndërsa niveli më i lartë i çmimeve regjistrohet në Maqedoninë e Veriut dhe Serbi.

LEXONI GJITHASHTU:

• BQE rrit normat e interesit, Lagarde: Perspektiva e inflacionit, e lartë dhe e gjatë
• Inflacioni në Evropë rritet para vendimit për normën e interesit