Inkursionet ruse, Belgjika ngre qendrën për mbikëqyrjen ajrore kundër dronëve

Këshilli për Sigurinë Kombëtare në Belgjikë mbajti një sesion të posaçëm pas konstatimit të dronëve mbi bazat ushtarake dhe aeroportet e vendit, prania e të cilëve shkaktoi një çoroditje të fluturimeve në aeroportin e Brukselit.

Për t’i bërë ballë kërcënimit, autoritetet po shqyrtojnë ngritjen e një qendre për mbikëqyrjen ajrore, si dhe ta bëjnë regjistrimin e dronëve të detyrueshëm.

“Nga një janari do të jetë operacionale NASC-ja, që do të thotë Qendra Kombëtare për Sigurinë Hapësinore. Ajo do të vendoset në bazën ushtarake në Biuveshin dhe do të ushtrojë të gjitha shërbimet. Ndaj sfidat fillojnë që në javët e ardhshme”, deklaroi ministri belg i Mbrojtjes, Theo Francken.

Ndërsa ministri i Brendshëm, Bernard Quintin tha se korniza e punës së qendrës së re do të përfshijë zbulimin, identifikimin dhe neutralizimin e objekteve të paidentifikuara.

Inkursionet me dronë ndodhën në një kohë kur BE po ushtron presion ndaj Belgjikës për të konfiskuar asetet e ngrira ruse që mbahen në qendrën Euroclear të Brukselit, për t’i përdorur për rindërtimin e Ukrainës.

Pavarësisht mungesës së provave, Rusia shihet gjerësisht si arkitekte e inkursioneve me avionë të telekomanduar.

Ministri belg i Mbrojtjes pritet të lëvrojë 50 milionë euro në kuadër të planit për ngritjen e qendrës së re.

LEXONI GJITHASHTU:

• Polonia dhe Rumania do të vendosin një sistem të ri mbrojtës ndaj dronëve rusë
• Polonia planifikon të ndërtojë murin e vet kundër dronëve