Instagram mohon se përdor mikrofonë telefoni për të gjurmuar përdoruesit

Drejtori ekzekutiv i Instagram, Adam Mosseri, ka mohuar zyrtarisht pretendimet se kompania përdor mikrofonë në telefonat e përdoruesve për të synuar reklamat.

Ai deklaroi se kjo do të përfaqësonte një shkelje të konsiderueshme të privatësisë, por gjithashtu se përdoruesit mund ta vinin re lehtësisht një monitorim të tillë nga drita e ndezur në krye të ekranit dhe shkarkimi më i shpejtë i baterisë, raporton TechCrunch.

Mosseri shpjegoi se rekomandimet dhe reklamat për përdoruesit bazohen në informacionin që reklamuesit ndajnë rreth vizitorëve në faqet e tyre, si dhe në krahasimin algoritmik të interesave të përdoruesve të ngjashëm. Kjo i lejoi platformat e Meta-s të krijonin reklama të sakta pa pasur nevojë të përgjonin bisedat private.

Ai vëren se algoritmet tani punojnë së bashku me psikologjinë njerëzore dhe rastësinë, gjë që ndonjëherë krijon përshtypjen se Instagram po lexon mendjet e përdoruesve. Kompania amerikane e teknologjisë Meta, pronare e Facebook dhe Instagram, njoftoi dje se do të fillojë t’u ofrojë reklama dhe rekomandime të tjera përdoruesve bazuar në ndërveprimet e tyre me asistentin dixhital Meta AI të kompanisë.

Ndryshimi hyn në fuqi më 16 dhjetor dhe përdoruesit do të marrin gradualisht informacion në lidhje me këtë ndryshim duke filluar nga 7 tetori. Përditësimi do të jetë i disponueshëm fillimisht në Mbretërinë e Bashkuar dhe Bashkimin Evropian, në varësi të kontrolleve standarde rregullatore. Portali i teknologjisë thekson se Instagram nuk do të ketë nevojë as të përgjojë përdoruesit përmes mikrofonit, pasi tashmë do të ketë në dispozicion një sasi të madhe të të dhënave të përdoruesve.

LEXONI GJITHASHTU:

• Instagrami vendos rregulla të reja për përdoruesit nën 16 vjeç
• Bien nga sistemi Facebook dhe Instagram