“Institucioni i Durrësit ka rënë”, Godet Karamuço: Burgu nuk garanton dot siguri

Ervin Karamuço, ekspert i sigurisë, ka folur mbrëmjen e kësaj të enjteje në “Now” në Euronews Albania, me moderatore Erla Mëhillin, lidhur me sigurinë në burgje, pas ngjarjes së arratisjes së Altin Ndocit, e ndodhur dy ditë më parë. Karamuço u shpreh se, sipas tij, institucioni i Durrësit ka rënë prej kohësh, pasi nuk ka garantuar mbrojtjen e të burgosurve.

“Në fakt, masa e parë që është bërë gjatë gjithë këtyre viteve, dhe që ka ndodhur brenda sistemit të burgjeve, kjo ka qenë. A është një masë që dikton siguri? Nuk di ta them. Durrësi ka vetëm seksion të sigurisë së lartë, si të gjitha burgjet e tjera. Atëherë ku është ndryshimi? Ky është një sinjal që, sipas Drejtorisë së Burgjeve, në burgun e Durrësit janë thyer rëndë rregullat. Edhe kur nuk garantohet mbrojtja ndaj këtyre personazheve të botës së krimit, ata duhet të zhvendosen në institucione të tjera. Nuk u thyen elementë të sigurisë së vetë burgut, por ajo që të shkon në mendje e para është se nuk garantohet ruajtja. Ky institucion ka rënë, nuk garanton funksionalitetin,” – tha Karamuço.