Irani kërkon marrëveshje “të vërtetë dhe të drejtë” me SHBA për programin bërthamor

Irani ka shprehur dëshirën për të arritur një marrëveshje “të vërtetë dhe të drejtë” me Shtetet e Bashkuara për programin e tij bërthamor, ka deklaruar Ali Shamkhani, këshilltar i liderit suprem të Iranit, Ayatollah Ali Khamenei.

Ky koment vjen përpara takimeve të mundshme në fundjavë në Oman, ku do të diskutohen çështje të rëndësishme për programin bërthamor iranian dhe mundësia për arritjen e një marrëveshjeje.

Marrëveshja është e rëndësishme, pasi administrata amerikane, nën udhëheqjen e Presidentit Donald Trump, ka kërcënuar vazhdimisht me mundësinë e veprimeve ushtarake nëse negociatat dështojnë. Trump i kishte dërguar një letër Khameneit muajin e kaluar, duke bërë thirrje për bisedime dhe duke paralajmëruar për mundësinë e një përgjigjeje ushtarake në rast se Irani refuzon.

Shamkhani konfirmoi se ministri i Jashtëm iranian, Abbas Araghchi, është nisur për në Oman dhe ka “autoritetin e plotë për negociata indirekte me Amerikën”. Ai shtoi se nëse SHBA-ja tregon vullnet të mirë, mund të arrihet një marrëveshje “të lehtë” për të dyja palët.

Përpara këtyre bisedimeve, Trump ka rikthyer kërcënimin se një veprim ushtarak është ende një mundësi nëse bisedimet dështojnë. Ndërkohë, Irani ka kërcënuar se mund të dëbojë inspektorët bërthamorë të Kombeve të Bashkuara, një veprim që do të përshkallëzonte tensionet dhe mund të çonte në pasoja të mëtejshme nga SHBA.

Irani vazhdimisht ka mohuar se ka plane për të zhvilluar armë bërthamore dhe ka theksuar se programi i tij është për qëllime paqësore. Në vitin 2015, Irani arriti një marrëveshje bërthamore me fuqitë botërore që e angazhoi të frenonte programin e tij bërthamor në këmbim të lehtësimit të sanksioneve ndërkombëtare. Por, në vitin 2018, Trump u tërhoq nga kjo marrëveshje dhe rivendosi sanksionet, duke nxitur Iranin të shkelë disa nga kufizimet e marrëveshjes.