Irani njoftoi Katarin para sulmit ndaj bazës amerikane për të shmangur viktimat

Irani e ka koordinuar paraprakisht sulmin me raketa ndaj bazës ajrore amerikane Al-Udeid në Katar me zyrtarët katariotë, me qëllim minimizimin e viktimave, raporton The New York Times, duke cituar tre zyrtarë iranianë në kushte anonimiteti.

Sipas raportit, Teherani e konsideroi të nevojshëm një kundërsulm simbolik ndaj SHBA-së pas sulmeve mbi objektet bërthamore iraniane, por kërkoi të shmangte përshkallëzimin, duke lënë hapur një dritare për ndalimin e përplasjes ushtarake mes palëve.

Deri tani, nuk ka pasur asnjë koment zyrtar nga qeveritë në Teheran apo Uashington në lidhje me këtë raport.

Këshilli i Lartë i Sigurisë Kombëtare i Iranit thotë në një deklaratë se, ndërsa Irani “shkatërroi” bazën ajrore amerikane në Katar, sulmi në asnjë mënyrë “nuk paraqet ndonjë rrezik për Katarin ose popullin e tij” dhe shton se Irani “mbetet i përkushtuar për të ruajtur dhe vazhduar marrëdhëniet e tij të ngrohta dhe historike” me Katarin.

Deklarata e Këshillit Suprem të Sigurisë Kombëtare të Iranit, e cituar nga media shtetërore e Iranit, thotë se “numri i raketave të përdorura ishte i njëjtë me numrin e bombave që SHBA-të kishin përdorur në tre centrale bërthamore iraniane”.

Momenti kur sistemet amerikane asgjesojnë raketat e lëshuara nga Irani në Doha pic.twitter.com/76Bgbz3Sof

— Euronews Albania (@EuronewsAlbania) June 23, 2025

LEXONI GJITHASHTU:

• “Premtimi i Fitores”, çfarë thotë Irani për sulmin ndaj bazave amerikane
• Mbrojtja ajrore e Katarit kap raketat e lëshuara nga Irani në bazën ajrore Al Udeid