Isa Mustafa: SHBA e solli Kurtin në pushtet, sot çmimin do ta paguajë gjithë Kosova

Ish-kryeministri i Kosovës Isa Mustafa tha se në vitin 2020 e prishi koalicionin me Vetëvendosjen për të shmangyr konfrontimin e Kosovës me SHBA-në.

Përmes një postimi në faqen e vet në Facebook, Mustafa shprehet se në atë kohë VV e mbështetën diplomatët e SHBA-së, Gjermanisë, Francës, Mbretërisë së Bashkuar duke e sjellë vetë në pushtet.

Sot sipas tij, çmimin e prishjes së relacioneve me SHBA-të dhe BE-në nuk do ta paguajë VV me Kurtin dhe Osmanin por do ta paguajë e gjithë Kosova.

“LDK në vitin 2020 prishi koalicionin me VV-në për të evituar konfrontimin e Kosovës me SHBA-të. E pagoi çmimin më të shtrenjtë me rreth 100 mijë vota! Por në atë kohë VV-në e përkrahnin diplomatët e SHBA-së, Gjermanisë, Francës, Mbretërisë së Bashkuar, raportuesja e Kosovës në Parlamentin Evropian e… E sollën vet në pushtet së bashku me analfabetët funksional. Sot, frikësohem se çmimin e prishjes së relacioneve me SHBA-të dhe BE-në, nuk do ta paguajë VV me Kurtin dhe Osmanin por do ta paguajë e gjithë Kosova. Ngushëllimi i vetëm më mbetet se Lidhja Demokratike e Kosovës e kishte vlerësuar drejtë rrezikun dhe vepruam mirë në interes të Kosovës”, shkruan Mustafa në Facebook.