Ish-ambasadori i Shqipërisë në Kosovë, Gëzim Podgorica deklaroi se presidenti serb, Aleksandër Vuçiç po mban marrëdhënie si me Perëndimin, ashtu edhe me Rusinë, teksa e etiketoi atë, si të ‘llasturarin’ e Perëndimit dhe të ‘birësuarin’ e Lindjes.

Në një intervistë për Euronews Albania, Podgorica u shpreh se me dërgimin e ushtrisë serbe në Veri, Vuçiç po ushtron presion.

Megjithatë, sipas tij, Vuçiç nuk do të kalojë në aventura dhe të hapë një konflikt në kufi.

“Po t’i shohësh gjërat pak më thellë, vëren se Aleksandër Vuçiç po vepron me një regji shumë të mirëmenduar, pavarësisht se deri ku do të dalë dhe deri ku do të shkojë. Gjithë këto kohë, ai ka qenë i llastuari i Perëndimit dhe i birësuari i lindjes. E gjitha kjo ka çuar në atë që ai ka ditur të luajë edhe me Perëdimin, për të marrë fondet, për të krijuar biznese të fuqishme që të zhvillojnë Serbinë dhe në të njëjtën kohë ka qenë në këtë simetri politike me Lindjen.

Kjo ka bërë që Vuçiç t’i ketë të forcuara pozitat brenda vendit, por edhe më shumë se kaq. Ky është një presion i hapur që bën ai, çon deri në provokime. Unë nuk mendoj që mund të bëjë aventura sa të kalojë edhe kufirin”, theksoi ai.

LEXONI GJITHASHTU

• Veriu i Kosovës në prag lufte? Ish-ambasadori: Momenti kur nisi tensioni me Serbinë
• Tensione në Veri, Vuçiç: Jemi duke bërë gjithçka për të ruajtur paqen e stabilitetin
• Sveçla mohon se Kosova ka ngritur gjendjen e gatishmërisë ushtarake