Ish-deputeti i Partisë Socialiste paraqitet në SPAK

Ish-deputeti i Partisë Socialiste, Armando Prenga, është paraqitur këtë të hënë në Prokurorinë Speciale Kundër Krimit të Organizuar dhe Korrupsionit.

I pyetur nga mediat pas daljes nga SPAK, Prenga tha se ishte thirrur në cilësinë e personit në dijeni në lidhje me protestën e 21 janarit 2011, ku u vranë në bulevard 4 protestes të PD-së.

“U pyeta për 21 janarin si pjesëmarrës, si protestues”, tha shkurtimisht Prenga.

Dosja e 21 janarit kaloi në SPAK pas vendimit të Gjykatës së Lartë që urdhëroi Prokurorinë e Posaçme për të hapur çështjen.

Krahas familjarëve të të ndjerit Aleks Nika, mbi kallëzimin e të cilëve SPAK u vu në lëvizje, janë marrë edhe deklarime të personave që dyshohet se kanë dijeni për atë që ndodhi në protestën e 21 janarit. Mes tyre janë ish-drejtori i përgjithshëm i policisë, Hysni Burgaj, si dhe ish-zv.drejtori Agron Kulicaj, ndërsa të kallëzuar janë zyrtarët më të lartë të kohës, si ish-kryeministri Sali Berisha dhe ish-ministri i Brendshëm, Lulzim Basha.

Në pyetje janë marrë dhe ish-deputetë të PS, si Saimir Tahiri, Arben Çuko, të cilët kanë qenë disa ndër organizatorët e protestës.

LEXONI GJITHASHTU:

• Paraqitet në SPAK ish-kreu i komunës së Shëngjinit
• Itinerari i kokainës drejt Shqipërisë, SPAK gjurmoi lëvizjen e “mallit”