Ish-diplomati izraelit: Trump ka fuqinë ta ndalojë konfliktin Izrael-Iran

Donald Trump mund të luajë një rol vendimtar në përfundimin e konfliktit midis Izraelit dhe Iranit, ka deklaruar ish-diplomati izraelit Alon Pinkas, i cili ka shërbyer si këshilltar për dy kryeministra të shtetit hebre.

Në një intervistë për programin Neësday të BBC World Service, Pinkas theksoi se presidenti amerikan gëzon ndikimin dhe autoritetin e nevojshëm për të ndërmjetësuar një marrëveshje paqeje.

“Trump është në një pozicion për të negociuar një marrëveshje paqeje,” u shpreh Pinkas. “Ai mund t’i ofrojë Teheranit një zgjidhje që do t’i lejonte regjimit të shpëtonte fytyrën dhe të pranonte një paqe të negociuar.”

Sipas Pinkas, Irani ndodhet aktualisht në një pozitë të dobët negociuese, çka e shtyn të zgjedhë përshkallëzimin ushtarak në vend të dialogut.

“Pikërisht për këtë arsye, Irani është i nxitur të vazhdojë luftimet dhe t’i shkaktojë më shumë dëme Izraelit,” theksoi ai.

Ish-diplomati izraelit sugjeroi gjithashtu se Trump mund të ndërhyjë direkt në procesin vendimmarrës të qeverisë izraelite.

“Presidenti Trump mund ta marrë telefonin dhe t’i thotë zotit Netanyahu: ‘Mjaft më, keni 24 orë për t’i dhënë fund kësaj’,” tha Pinkas.

Megjithatë, ai pranoi se nuk është e qartë nëse Trump do të ndërmarrë hapa konkretë në këtë drejtim: “A do ta bëjë ndonjërën nga këto të dyja? Nuk e di.”