Ish-futbollisti i njohur i Interit arrestohet për trafik droge nga Amerika Latine

Ish-mesfushori i skuadrave të njohura si Roma, Inter dhe Cagliari, Radja Nainggolan, është arrestuar në Belgjikë pas akuzave për trafik ndërkombëtar droge. Sipas raporteve të medieve belge dhe italiane, 36-vjeçari është arrestuar pas një operacioni të gjerë që përfshinte 30 bastisje në qytetet e Antwerp-it dhe Bruksel-it.

Nainggolan është një nga të dyshuarit kryesorë në një hetim që lidhet me trafikun e kokainës nga Amerika e Jugut në Evropë përmes portit të Antwerp-it.

Të dhënat paraprake u bënë të ditura përmes një deklarate nga Prokuroria e Brukselit.

I njohur për karrierën e tij të gjatë në futbollin italian, Nainggolan kaloi më shumë se 15 vjet në këtë kampionat, duke nisur si lojtar i Piacenzas në vitin 2005, për t’u bërë më pas pjesë e Cagliarit në 2010. Ai u bë i njohur me Romën, ku shënoi 28 gola në 138 paraqitje në Serie A midis 2014 dhe 2018. Nainggolan më pas kaloi tre vitet e ardhshme tek skuadra e  Inter.

Së fundmi, Nainggolan u kthye në Belgjikë për të luajtur me skuadrën e divizionit të dytë KSC Lokeren-Temse, ku bëri debutimin e tij të premten, duke shënuar gol në fitoren 1-0 ndaj Koninklijke Lierse.

LEXONI GJITHASHTU:

• Dorëheqja e Maganit, Tirana rikthen në pankinë ish-trajnerin
• Broja bujë në mediat britanike, vlerësohet për paraqitjen ndaj Man Cityt