Ish-presidenti Obama mbështet Bad Bunny: Demonstrim kulture dhe diversiteti amerikan

Performanca e Bad Bunny në Super Bowl ka shkaktuar debate të forta politike në Shtetet e Bashkuara, ndërkohë që shënoi një nga shikueshmëritë më të larta në historinë e eventit.

Reagimet negative erdhën kryesisht nga figura konservatore, të cilët kritikuan faktin që artisti performoi pothuajse tërësisht në gjuhën spanjolle. Pas komenteve publike nga ish-presidenti Donald Trump, disa ligjvënës republikanë kërkuan një hetim zyrtar për transmetimin e shfaqjes.

Kongresmeni Andy Ogles i kërkoi Komitetit të Energjisë dhe Tregtisë në Dhomën e Përfaqësuesve një hetim, duke e cilësuar performancën “të pahijshme”, veçanërisht për shkak të disa këngëve. Gjatë transmetimit të drejtpërdrejtë, tekstet e këngëve si “Tití Me Preguntó” dhe “Monaco” u censuruan.

Megjithatë, Komisioni Federal i Komunikimeve (FCC) vendosi se performanca nuk kishte shkelur asnjë rregull të transmetimit dhe nuk do të ndërmerrte veprime të mëtejshme.

Në mbështetje të shfaqjes doli edhe ish-presidenti Barack Obama, i cili e cilësoi performancën si një demonstrim kulture dhe përfshirjeje, duke theksuar se ajo reflekton ndjenjën e komunitetit dhe diversitetin amerikan.

Pavarësisht polemikave, shifrat tregojnë sukses të madh. Sipas të dhënave zyrtare, performanca e Bad Bunny u ndoq nga 128.2 milionë shikues, duke u renditur e katërta më e ndjekur në historinë e Super Bowl.

Ndërkohë, sipas Apple Music, dëgjimet e këngëtarit u rritën shtatëfish pas performancës, duke konfirmuar ndikimin e fortë të shfaqjes tek publiku global.