Ish-punonjësi ‘tradhton’ Trump, shefi i IT-së ‘fundos’ ish-presidentin me dëshminë

Ish-presidenti Donald Trump është përfshirë nga një prej punonjësve të tij në resortin Mar a Lago në çështjen e dokumenteve të klasifikuara.

Jusil Taveras, që mban postin e drejtorit të IT-së së kompleksit dhe i identifikuar si “Punonjësi numër 4” në dokumentet ligjore, ndryshoi dëshminë e tij pasi ndërroi avokat.

Tani, ai akuzon zotin Trump dhe dy bashkëpunëtorë për “përpjekje për të fshirë materiale të filmuara nga kamerat e sigurisë”, thotë dosja e gjykatës që ka në dorë çështjen.

Ish-presidenti 77-vjeçar përballet me 40 akuza lidhur me keqmenaxhimin e dokumenteve të klasifikuara. Vetë ai dhe dy ndihmësit personalë kanë mohuar akuzat dhe janë vetëdeklaruar të pafajshëm.

Trump akuzohet për keqpërdorim të dosjeve sekrete dhe magazinim të tyre në resortin e tij në Florida, si dhe për përpjekje për të fshehur krimin duke eliminuar pamjet filmike.

Dosja e gjykatës thotë se shefi i IT-së së rezidencës së Trump ndërroi avokat pasi hetuesi i posaçëm Jack Smith, që po mbikëqyr çështjen, e informoi se po hetohej për dëshmi të rremë.

Gjatë dëshmisë përpara jurisë së madhe në mars të këtij viti, Jusil Taveras vazhdimisht mohoi dhe tha se nuk mbante mend të kishte zhvilluar biseda për eliminimin e pamjeve filmike në Mar a Lago.

Kjo gjë i ishte kërkuar atij pasi hetuesit kërkuan që t’u jepeshin pamjet filmike teksa lokalizonin lëvizjen e kutive që mbanin dosjet me informacione të klasifikuara.

LEXONI GJITHASHTU:

• Mbështetja për Trump mes votuesve republikanë u rrit pavarësisht aktakuzës së re
• Donald Trump po planifikon të anashkalojë debatin e parë republikan