Ish-rivalët bashkohen me Trump, Haley dhe De Santis mbështesin ish-presidentin

Një nga një, rivalët e mundur të Donald Trump për nominimin republikan të 2024-s hipën në skenë për të vlerësuar figurën e tij në ditën e dytë të konventës së partisë.

Nga vendi i tij në sallën e konventës, Trump buzëqeshte herë pas here teksa shihte ish-kundërshtarët Niki Hejli dhe Ron De Santis të shprehnin mbështetjen për kandidaturën e tij.

“Do ta nis fjalimin tim duke bërë një gjë të qartë: Donald Trump ka mbështetjen time më të fuqishme”, deklaroi Niki Hejli.

Ish-ambasadorja e Shteteve të Bashkuara në OKB bëri të ditur se kishte qenë vetë Trump që i kishte kërkuar të fliste në konventë, në emër të unitetit.

“Për hir të vendit tonë, ne duhet të mbështesim Donald Trump”, deklaroi Hejli, e cila u duartrokit nga ish-presidenti.

Rivali tjetër, që në garën e nominimeve përfundoi i treti, Ron De Santis u prit me më shumë entuziazëm nga turma. Në fjalimin e tij, ai preku një seri çështjesh sociale të karakterit konservator.

Gjithashtu, ai i bëri thirrje të pranishmëve të rreshtohen pas Trump. “Ne nuk mund ta braktisim atë, nuk mund të braktisim Amerikën”, deklaroi De Santis.

Ai foli edhe për moshën e presidentit aktual Joe Biden, çështje që po trajtohet në radhët e demokratëve. “Neve na duhet një president që të mund ta udhëheqë vendin 24 orë në ditë dhe 7 ditë të javës”, tha guvernatori i Floridës.

LEXONI GJITHASHTU:

• Nis hetimi ndaj Shërbimit Sekret pas atentatit ndaj Trumpit
• Antentati ndaj Trump| Sondazhi: Shumica e amerikanëve i tremben kaosit në vend