Ish-shefi i Frontex akuzohet për krime kundër njerëzimit

Gjykata e Apelit e Parisit ka hapur një hetim ndaj ish-kreut të Agjencisë Evropiane të Rojës Kufitare dhe Bregdetare, Fabrice Lezéry , për akuza që lidhen me krime kundër njerëzimit , tha një burim gjyqësor për Reuters.

Lezéry dha dorëheqjen nga Frontex në vitin 2022, pas akuzave serioze nga organizatat e të drejtave të njeriut se, nën udhëheqjen e tij – e cila filloi në vitin 2015, në kulmin e krizës së migracionit në Evropë – agjencia i keqtrajtoi migrantët në kufijtë e BE-së.

Lezéry, tani eurodeputet me partinë franceze të ekstremit të djathtë, Tubimi Kombëtar, i ka mohuar prej kohësh akuzat. Nëse prokurorët kërkojnë ta padisin atë, ata do të duhet të kërkojnë heqjen e imunitetit të tij si anëtar i Parlamentit Europian, gjë që do të kërkonte një votim në parlament.

Gjykata e Parisit vendosi të hapë hetimin më 18 mars, pas një apeli nga Lidhja Franceze për të Drejtat e Njeriut (LDH) dhe organizata për të drejtat e migrantëve Utopia 56. Të dy organizatat akuzuan Lezéry-n se i inkurajoi zyrtarët e Frontex-it të ndihmonin autoritetet libiane dhe greke të kapnin anijet e migrantëve me qëllim që t’i pengonin ata të hynin në BE.

Gjykata e Apelit vendosi se kishte baza të mjaftueshme për të filluar një hetim gjyqësor dhe e përshkroi ankesën si “pjesërisht të bazuar”, shtoi i njëjti burim.