Ish-zv. kryeministria Mandia: Në Kongresin e 11 dhjetorit nuk pashë hajna, 18 dhjetori ishte ilegjitim

Ish-zv. kryeministrja Ledina Mandia tha në studion e “Now” në Euronews Albania se ka humbur demokracia brenda Partisë Demokratike.

Ajo tha se anëtarësia nuk ka më besim te lidershipi e për këtë arsye është zhvilluar edhe Kuvendi i 11 dhjetorit, Kuvend që është i vetmi legjitim sipas Mandias.

Mandia tha se kryetari i PD-së Lulzim Basha ‘ka hedhur baltë’ mbi mbështetësit e Sali Berishës në Kuvendin e 11 dhjetorit, por sipas saj ky Kuvend ka qenë i rregullt dhe s’ka shprehur gjë tjetër veç vullnetit të lirë të anëtarësisë së PD-së.

“Unë kam ngelur e befasuar nga gjuha e kryetarit dhe anëtarëve të kryesisë së PD-së për t’i bërë qejfin kryetarit. Në Kuvendin e datës 11, vullneti ishte i lirë. Pashë jo hajna, jo kriminelë”, u shpreh Mandia.

Përkundrazi, Ledina Mandia tha se ilegjitim është pikërisht Kuvendi i 18 dhjetorit, i thirrur nga Lulzim Basha, pas vendimeve që u morën në Kuvendin e thirrur nga Sali Berisha.

Meqenëse iniciativa e Sali Berishës dhe mbështetësve të tij është legjitime sipas Mandias, atëherë Komisioni i Rithemelimit do të vazhdojë të bëjë mbledhje në zyrat e PD-së.