Iu bllokonte valët e telefonit, kush është i riu që mbante të mbyllura nënën e gruan

Jetnor Zhaboli, është 35-vjeçari i arrestuar këtë të premte nga policia e Tiranës, pasi sa herë që dilte nga shtëpia ai mbyllte brenda nënën, bashkëshorten dhe vajzën e tij të mitur.

Ai u kishte ndaluar atyre të komunikonin me njerëz të tjerë, u bllokonte valët e telefonit dhe në momentin që nuk ndodhej në banesë i monitoronte ato përmes kamerave.

Përveçse i mbante të mbyllura në banesë, 35-vjeçari ushtronte dhunë fizike dhe psikologjike, në mënyrë të vazhdueshme, ndaj bashkëshortes.

Njoftimi i policisë:

Shërbimet e Komisariatit të Policisë Nr. 1, në bashkëpunim me Seksionin për Parandalimin e Dhunës në Familje dhe Mbrojtjes së të Miturve në DVP Tiranë, pas informacionit të marrë se një shtetas, ushtronte dhunë në mënyrë të vazhdueshme ndaj bashkëshortes së tij, si dhe e mbante të mbyllur atë, nënën dhe vajzën e tij, sa herë ai largohej nga banesa, menjëherë kanë organizuar punën për dokumentimin e plotë ligjor të rastit, dhe vënien e autorit të dyshuar, përpara përgjegjësisë penale.

Si rezultat, falë reagimit në kohë të shërbimeve të Komisariatit të Policisë Nr. 1, u arrestua shtetasi J. Zh., 35 vjeç, banues në Tiranë.

Nga veprimet hetimore të kryera ka rezultuar se 35-vjeçari, ushtronte dhunë në mënyrë të vazhdueshme ndaj bashkëshortes së tij, të cilën e mbante të mbyllur në banesë, së bashku me nënën dhe vajzën e tyre të mitur.

Gjithashtu, nga verifikimet e kryera ka rezultuar se 35-vjeçari, sa herë largohej nga banesa, i monitoronte me kamera dhe ju bllokonte valët e telefonit duke mos i lejuar të komunikojnë me asnjë person.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshën Tiranë, për veprime të mëtejshme procedurale.

LEXONI GJITHASHTU:

• Dhunonte dhe mbyllte në banesë nënën, gruan dhe vajzën e mitur, në pranga 35-vjeçari
• Vetëvrasja e policit/ Eksperti: 35 vite në shërbim, e hodhën në rrugë brenda ditës