Ivica Daçiç: Barrikadat, luftë politike e serbëve kundër terrorit të Albin Kurtit

Ministri i Punëve të Jashtme të Serbisë, Ivica Daçiç deklaroi se institucionet e Kosovës dhe kryeministri Albin Kurti janë kërcënimi më i madh për paqen dhe çdo marrëveshje.

Daçiç e ka cilësuar si cinike sjellken e përfaqësuesve të bashkësisë ndërkombëtare, e cila ngre çështjen e barrikadave si çështje kryesore, shkruan Euronews Serbia.

Sipas tij, barrikadat janë lufta politike e serbëve të Kosovës kundër terrorit të Kurtit dhe për respektimin e Marrëveshjes së Brukselit.

“Serbët po reagojnë për mosrespektimin e gjithçkaje që është nënshkruar deri më tani. Është një luftë politike që po bën populli serb dhe tani keni kërcënime se dikush do t’ia heqë me dhunë. Nuk ka incidente, dhe kjo është e rëndësishme që të mos i japim dikujt arsye për të thënë sërish se serbët janë fajtorë”, theksoi ai.

Ditën e djeshme, në anën serbe afër Jarinjës – pikëkalimit kufitar mes Kosovës dhe Serbisë u mbajt një protestë e thirrur nga grupe djathtiste serbe, si shenjë mbështetjeje ndaj barrikadave që kanë ngritur serbët lokalë në veri të Kosovës.

Protestuesit janë shpërndarë pasi Policia serbe u ka thënë se do të lirojë një person që ka arrestuar në protestë.

LEXONI GJITHASHTU

• Gazetari: KFOR-i gati të ndërhyjë në veri, mesazh i fortë për Serbinë
• KFOR-i shton praninë në Jarinjë pas protestës së serbëve
• Sveçla për protestën në Jarinjë: Episod i luftës hibride serbo-ruse ndaj Kosovës