Izraeli bombardon Libanin, numri i viktimave shkon në 569

Izraeli bombardoi sërish objektivat e militantëve të Hezbollahut në Liban të martën, ndërsa numri i të vdekurve nga sulmet ajrore që prej së hënës arriti në 569 dhe numri i të plagosurve në 1,835 vetë.

Ushtria izraelite tha se sulmet e saj të martën goditën dhjetëra objektiva të Hezbollahut, mes tyre militantë të përfshirë në lëshimin e raketave në veri të Izraelit.

Izraeli tha se një nga sulmet e tij në periferitë jugore të Bejrutit u vra Ibrahim Muhammad Qubaisi, i identifikuar nga Izraeli si një komandant i lartë ushtarak i Hezbollahut që mbikëqyrte sistemet raketore të grupit.

Agjencia e Kombeve të Bashkuara për Refugjatët tha se ishte “e indinjuar dhe thellësisht e pikëlluar” nga sulmet e tjera izraelite që lane të vrarë dy punonjës të saj.

Ndërkohë, sipas zëvendës Këshilltarit për Sigurinë Kombëtare, Jon Finer, zyrtarët e administratës së Presidentit Biden janë të angazhuar në bisedime me aleatët për të ndihmuar në shtensionimin ndërmjet Izraelit dhe Hezbollahut.

“Po punojmë në kohë reale këtu në Nju Jork dhe nëpër kryeqytetet e botës”, deklaroi zoti Finer. “Nuk mund t’i bëjmë publike të gjitha detajet e këtyre bisedimeve të ndjeshme, por duam që konflikti të mos përshkallëzohet”.

Zoti Finer iu shmang pyetjeve nëse luftimet tashmë janë shndërruar në luftë të hapur me Libanin, për të cilën Shtetet e Bashkuara i bën trysni që ta shmangte ndërkohë që vazhdon konfliktin njëvjeçar në Gazë. Por ai tha se një “luftë e madhe, një luftë më e gjerë” nuk është në interesin e Izraelit e as të Libanit.

LEXONI GJITHASHTU:

• Irani: Luftimet mes Izraelit e Libanit mund të shndërrohen në luftë rajonale
• Zelensky: Rusia mund të arrijë paqe vetëm nëse detyrohet