Izraeli justifikon sulmin ndaj Iranit, i dërguari në OKB: Vendimi nuk u mor lehtë

I dërguari i Izraelit në Kombet e Bashkuara, Danny Doron, deklaroi të premten se vendimi për të ndërmarrë sulmin ndaj Iranit gjatë orëve të para të mëngjesit nuk ishte marrë lehtësisht. Në një konferencë për shtyp, ai theksoi se ky veprim erdhi si reagim ndaj veprimeve të përsëritura armiqësore të regjimit iranian.

“Vendimi për të vepruar mbrëmë nuk u mor lehtë. Ai erdhi pas shkeljeve të përsëritura nga regjimi iranian, mashtrimit të vazhdueshëm dhe mungesës së pasojave kuptimplote ndërkombëtare,” u shpreh Doron para gazetarëve.

Ai shtoi se Izraeli kishte “zbuluar prova të qarta” se Irani po planifikonte një sulm të befasishëm ndaj Izraelit dhe se veprimi i natës së kaluar ishte një masë parandaluese. “Izraeli nuk mund dhe nuk do të priste që të vinte ai moment,” tha Doron me vendosmëri.

Duke iu drejtuar popullit iranian, Doron theksoi se sulmi nuk ishte drejtuar kundër tyre, por ndaj strukturave ushtarake dhe udhëheqjes që përbëjnë kërcënim. “Po i them popullit iranian shumë drejtpërdrejt se nuk kemi asgjë kundër tyre. E dimë që po vuajnë. I kemi parë kushtet ku jetojnë… Lufta jonë nuk është kundër popullit të Iranit,” tha ai.

Sipas Doron, sulmi ishte planifikuar për t’u realizuar në një kohë kur civilët nuk ishin në rrugë, me qëllimin për të minimizuar humbjet njerëzore.

LEXONI GJITHASHTU:

• 5 të plagosur në Tel Aviv, Netanyahu: Regjimi iranian nuk e di çfarë do ta godasë
• “Dy avionë luftarakë janë rrëzuar”, Irani lëshon qindra raketa balistike në Izrael