Izraeli miraton ndërtimin e 764 banesave në Bregun Perëndimor

Ministri i Financave i Izraelit, Bezalel Smotrich, njoftoi të mërkurën se Izraeli ka dhënë miratimin përfundimtar për ndërtimin e 764 njësi banimi në tre vendbanime në Bregun Perëndimor të okupuar.

Smotrich, një ultra-nacionalist që kundërshton krijimin e një shteti palestinez, tha se që nga fillimi i mandatit të tij në fund të vitit 2022, rreth 51,370 njësi banimi janë miratuar nga Këshilli i Lartë i Planifikimit të qeverisë në Bregun Perëndimor, territor që palestinezët kërkojnë për një shtet të ardhshëm.

“Ne vazhdojmë revolucionin,” tha Smotrich në një deklaratë, duke shtuar se miratimi i fundit i njësiteve të banimit “është pjesë e një procesi të qartë strategjik për forcimin e vendbanimeve dhe sigurimin e vazhdimësisë së jetës, sigurisë dhe rritjes, dhe një kujdes i vërtetë për të ardhmen e Shtetit të Izraelit”.

Njësitë do të shpërndahen midis Hashmonaim, pak mbi Linjën e Gjelbër në qendër të Izraelit, dhe Givat Zeev dhe Beitar Illit pranë Jerusalemit.

Shumica e fuqive botërore e konsiderojnë vendbanimet izraelite, në tokën që Izraeli pushtoi në luftën e vitit 1967, si të paligjshme, dhe shumë rezoluta të Këshillit të Sigurimit të OKB-së kanë kërkuar nga Izraeli të ndalojë aktivitetin e vendbanimeve.

“Për ne, të gjitha vendbanimet janë të paligjshe dhe bien ndesh me të gjitha rezolutat e legjitimitetit ndërkombëtar”, tha Wasel Abu Yousef, anëtar i Komitetit Ekzekutiv të Organizatës për Çlirimin e Palestinës.

Izraeli thotë se vendbanimet janë thelbësore për sigurinë e tij dhe përmend lidhjet biblike, historike dhe politike me territorin.

Sulmet e kolonëve izraelitë kundër palestinezëve janë në rritje. Sipas një raporti të OKB-së, të paktën 264 sulme ndaj palestinezëve në Bregun Perëndimor janë regjistruar në tetor, numri më i lartë mujor që nga viti 2006 kur zyrtarët e OKB-së filluan të monitoronin këto incidente.

LEXONI GJITHASHTU:

• “Britania dhe BE në verbëri politike” Lavrov: Trump, i vetmi që e kupton Rusinë
• Avionët kaluan zonën ajrore, Seuli ankohet te përfaqësuesit e Kinës dhe Rusisë