Izraeli vret kryeministrin e rebelëve Huthi, eliminohen dhe zyrtarë ushtarakë

Kryeministri i rebelëve Huthi, në Jemen, Ahmed al Rahawi ka mbetur i vrarë në një seri sulmesh ajrore izraelite në Sana, që vunë në shënjestër edhe autoritetet më të larta ushtarake.

Al Rahawi, i mbështetur nga Irani, ndërroi jetë në apartamentin e tij bashkë me disa bashkëpunëtorë, bënë të ditur mediat lokale.

Ndërkohë, autoritetet izraelite deklaruan se besojnë që mes zyrtarëve të eliminuar të jetë edhe ministri i Mbrojtjes, Mohamed al Atifi, si dhe shefi i Shtabit të Përgjithshëm të rebelëve Huthi, të cilët ishin mbledhur në një lokalitet në rrethinat e kryeqytetit.

Sulmet ajrore përkuan me një fjalim të planifikuar nga lideri i rebelëve huthi Abdul Malik al Houthi, edhe pse autoritetet hebraike thanë se lideri i grupit nuk ishte i pranishëm në pikat e sulmuara.

Ministri izraelit i Mbrojtjes, Israel Katz, që aprovoi sulmet bashkë me kryeministrin Netanyahu dhe kreun e shtabit, gjeneralin Eyal Zamir, tha se rebelët e dinin mirë se cilat do të ishin pasojat për sulmet ndaj objektivave izraelitë.

“Sikurse i kishim paralajmëruar, kush vë dorë ndaj Izraelit do t’i priten duart”, deklaroi ministri Katz.

Ndërsa krerët e Forcave Mbrojtëse Izraelite konfirmuan se kishin goditur një objektiv të atij që e quajtën “regjimi terrorist ushtarak” të Jemenit.

Rebelët huthi, që kontrollojnë pjesën dërrmuese të territorit në veri-perëndim të vendit, përfshirë detin e Kuq dhe kryeqytetin Sana, kanë kryer rregullisht sulme me raketa dhe dronë ndaj Izraelit dhe anijeve të vendeve të tjera që nga fillimi i luftës Izrael-Hamas në Gaza, në shenjë solidariteti me popullin palestinez.

LEXONI GJITHASHTU:

• Vrasja e 5 gazetarëve nga Izraeli, reagon Benjamin Netanyahu
• Kush janë pesë gazetarët e vrarë në Gaza në spitalin Nasser në Khan Yunis?