“Jo traut në Parkun e Divjakës”, banorët protestojnë kundër pagesës

Banorët e Divjakës refuzojnë të paguajnë lekë për të vizituar Parkun e Karavastasë në Divjakë. Ata kanë protestuar dhe janë përplasur me policinë, duke kërkuar heqjen e traut të vendosur në hyrje të parkut.

Vizitorët që hyjnë ne parkun e Divjakës, duhet të paguajnë tarifë. Bileta është kërkuar dhe vendosur nga Agjencia e Zonave të Mbrojtura me cmim 50 lekë për individët dhe 150 lekë për automjetet.

Por, trau i vendosur në hyrje të parkut nuk është mirëpritur nga banorët dhe deputetët e zonës.

Ata kanë mbajtur në duar pankarta të ndryshme ku shkruhej, “Mos ndaloni ajrin” dhe “Fëmijët tanë duan oksigjen”.

“Zoti kryeministër, këtë pistë të Parkut Kombëtar e ka mbrojtur populli i Divjakës dhe nuk e lejon që të bllokojë këtë rrugë”, tha një banor.

Protestuesit kanë shtyrë mes tensionesh me policët, kabinën e vendosur në hyrje të parkut, duke treguar vendosmërinë që të rikthehen sërish aty, nëse ajo do të rivendoset. Në mbështetetje të tyre, kanë qenë edhe përfaqësues të Partisë Demokratike.

“Është e papranueshme që të bllokohet hyrja e Parkut Kombëtar dhe një prej plazheve më të mëdha në Republikës së Shqipërisë. Populli, vullnetin e tij e shpreh nëpërmjet deputetëve”, u shprehën ata.

Laguna e Karavastasë është parë nga 500 mijë vizitorë vitin e kaluar, dhe me këtë fluks njerëzish, të ardhurat nga biletat mund të arrijnë deri në 4.3 mln euro.

LEXONI GJITHASHTU

• “Biletë modeste, vetëm 50 lekë”, Ministria e Turizmit reagon për Parkun në Divjakë
• “Ministri arrogante”, Braçe sulmon Kumbaron për traun në Divjakë
• Braçe kundër vendimit: E paligjshme vendosja e traut në Parkun e Divjakës