​Kadri Veseli: Ushtria e Kosovës, argumenti më i mirë për ata që mohojnë sukseset e shtetit tonë

Kryetari i Partisë Demokratike të Kosovës, Kadri Veseli ka deklaruar se 21 vjet më parë, në koordinim të plotë me NATO-n, filloi transformimi madhor i Ushtrisë Çlirimtare të Kosovës në Trupat Mbrojtëse të Kosovës.

Me një shënim në faqen zyrtare në “Facebook”, lideri i PDK-së shprehet se Ushtria e Kosovës, është kurorëzim i suksesit të madh institucional e shoqëror që është arritur bashkërisht.

“Me gjithë sfidat, kjo ushtri, është argumenti më i mirë për ata që njëzet vjet pas lufte mohojnë sukseset e shtetit tonë. Nderim për të gjithë pjesëtarët që ishin pjesë e këtij transformimi, ashtu si për vijuesit e asaj rruge, oficerët dhe ushtarët tanë të sotëm”, shkruan ai.

Gjatë ditë së sotme ka reaguar edhe Presidenti i Republikës, Hashim Thaçi, i cili theksoi se Ushtria e Kosovës shumë shpejt do të jetë pjesë e misioneve paqësore të Aleancës së Atlantikut të Veriut (NATO).

“Rrugëtimi i ushtrisë sonë ishte rrugëtim i lirisë dhe pavarësisë së Kosovës. Nderime dhe respekt për të gjitha gratë dhe burrat që sakrifikuan gjithçka për këtë ditë. Jemi krenarë me ushtrinë e Kosovës, e cila së shpejti do të jetë pjesë e misioneve paqësore të NATO-s kudo nëpër botë”, shkroi Thaçi.