Kryetari i Partisë Demokratike, Sali Berisha, u prit me një festë të madhe në selinë e PD-së, pas vendimit të GJKKO për heqjen e masës së “Arrest në Shtëpi”.

Në fjalën e tij, Berisha falënderoi simpatizantët që e mbështetën gjatë ditëve të izolimit, por edhe gjyqtaren që vendosi të heqë masën e sigurisë. Kryedemokrati i drejtoi një pjesë të fjalimit të tij dhe kryeministrit Rama, ku i kërkoi të pranojë kërkesën e opozitës për një qeveri teknike. Berisha tha se Rama do të përgjigjet për përpjekjet për asgjësimin e opozitës, izolimin e liderit të saj, si dhe grabitjen e flamurit të PD-së.

“Kam edhe një fjalë të fundit për autorin kryesor të grushtit të shtetit që iu bë opozitës shqiptare në Shqipëri:

Edi Rama, krijo qeverinë teknike, mos e zvarrit kot narkopushtetin tënd, se vetë Zoti e ka thënë: ‘Që të kthehem, unë do ta pastroj shtëpinë, ne do ta pastrojmë shtëpinë tonë, me ndihmën e Zotit.’ Besimin e pathyeshëm do ta ruajmë.

Krijo qeveri teknike, se mosbindja civile është gati në radhë. Këta burra e gra, djem e vajza do të kenë liderin e tyre me vete. Këta shqiptarë duan përgjigje nga ty, se piramida jote e mashtrimit do të përballet me të vërtetën.

Do të përgjigjesh si puçist për grushtin e shtetit që i bëre opozitës, do të përgjigjesh për vitin që ke lënë kryetarin e opozitës në arrest shtëpie, do të përgjigjesh për atentatin që organizove kundër tij me qëllim për ta heshtur, do të përgjigjesh për dy vitet që grabite flamurin e PD-së.

Prandaj ke vetëm një rrugë, krijo një qeveri teknike dhe shkojmë në zgjedhje të lira. Pse Edi Rama ke frikë nga vota e shqiptarëve? Sot ishte një fitore, por kemi akoma shumë punë për të triumfuar përfundimisht. Ftoj të na bashkohen të gjithë,” tha Berisha.

LEXONI GJITHASHTU:

• Sali Berisha lirohet nga arresti shtëpiak
• Lirimi i Berishës, vjen reagimi i parë nga deputetët e PD: Fitorja e Trump…