Kamzë dhe Astir, policia në aksion për çmontimin e kamerave të grupeve kriminale

Operacioni “Fijet” është shtrirë sot në terrirorin e komisariatit nr.5 dhe 6 në kryeqytet. Në Kamzë dhe Zall-Mner deri më tani mendohet të jenë çmontuar nga forcat e policisë rreth 40 kamera.

Një zonë problematike është edhe ajo e Astirit në territorin e komisariatit nr.6, ku forcat e policisë po operojnë në terren për heqjen e kamereva nën kontrollin e grupeve kriminale.

Sipas burimeve, në qarkun e Tiranës janë identifikuar rreth 100 kamera të tilla, të cilat do të hiqen brenda ditëve të para të kësaj jave. Deri më tani në rang vendi janë çmontuar rreth 200 kamera të vendosura kryesisht nga persona me precedentë penalë, të cilët dyshohet se monitoronin lëvizjet e policisë por dhe rivalëve.

Operacioni nisi fillimisht në Shkodër, ku fenomeni ishte alarmant dhe më pas u shtri në Durrës, Fier, Vlorë, Korçë, Lushnjë, Gjirokastër e Dibër. Deri më tani nën hetim në gjendje të lirë janë vënë rreth 30 persona.